٥ مشاهد رسمت تفوق الزمالك على الأهلي وكتبت لهم السوبر الأفريقي

 

الكورة سيناريوهات ،،  و مافيش " فرقة جماهيررية " بتدخل ماتش قدام فريق شايف نفسه هايكسب بسهولة غير وبيحصل السيناريو دا .. الفريق الغير مرشح بالمرة هو اللي بيكسب وجمهورة بيفرح ..

 

هنا هانشاور على  ٥ مشاهد رسمت تفوق الزمالك على الأهلي وكتبت لهم السوبر الأفريقي ..

اولاً : الرغبة … اكتر حاجة كانت واضحة على الفريقين في ماتش السوبر الافريقي في الرياض كانت أن لاعيبة الزمالك عندهم رغبة كبيرة في الفوز .. حتى لو مكنوش مؤهلين للفوز على اقوى فريق في افريقيا حالياً.. بس رغبتهم في الفوز في الماتش دا كانت اعلى بكتير من لاعيبة الاهلي ..

ثانياً  : الحالة الفنية  للنجوم ... اللاعب لما بيدخل مباراه كبيرة زي دي بكل الصخب اللي حصل حواليها بيحاول يظهر قدراتة ..

 يرقص ترقيصة  يهز ثقة المنافس بتاعة في نفسة ، بس لو مش مركز ومش جاهز و غلط وهو بيعمل كدة بتتقلب عليه وبيكون شكله مش حلو  وخصوصاً لو الجمهور مش سايبة في حالة  ولو معندوش برود  الاعصاب بيخرج برة الماتش ..

 

ثالثاً : ذكاء المدرب  .. وهنا انا مش بتكلم على فكرة خطة اللعب أو التكتيك اللي هايبدأ بيه وكدة لا ... المحللين تقريباً من قبل المباراة بكام يوم وهما مجمعين أن الزمالك مقدموش حل تاني غير اللي عملة جوميز ... بس انا هنا بتكلم على ذكاء المدرب أنه ميخرجش لاعيبتة من تركيزهم ويرجعلهم الهدوء اللازم انهم يكملوا المباراة بعد ضربة الجزاء ويأهلهم انهم يستقبلوا هدف ويدي فرصة لحارس المرمى ياخد نفسة من الموقف .. وكمان يحاول يشتت وسام أبو علي اللي هايشوط ضربة الجزاء وكل دة في حركة أنه يسحب اللاعيبة من الملعب وكأن الزمالك هاينسحب ... الحركة دي فعلاً جابت نتيجة على مدار الماتش بأنها كمان أكدت للاعيبة الأهلى إحساسهم أنهم كدا كدا كسبانين  ..

 

رابعاً :  تغيررات  على عكس العادة  ..
مارسيل كولر " العظيم" وأة بقولك أنه عظيم .. مش علشان ماتش خسرة بضربات الجزاء هاتخسف بيه الأرض الراجل دايس على وش افريقيا كلها بقالة سنتين على التوالي عادي جداً لازم هايخسر وممكن يخسر تاني وتالت والمفروض انه ميكنش فيه مشكلة مدام بيرجع ويعدل الفريق ويكسبك بطولات كتيرة ومخليك دايماً واقف على رجلك ..
كولر في الماتش دا عمل حاجة غير معتادة عنه ... أنه غير بدري جداً .. تغيير بيرسي تاو وإمام عاشور كان بدري .. بس هو ادرى طبعاً بفكرة الاحمال البدنية وكل لاعب المفروض يلعب قد ايه وكدا بس كمان الأهلي خلص تغيراتة وبعدين أكرم توفيق أتصاب وكمل الماتش وهو مصاب وكان ممكن يتسبب في أن الزمالك يسجل التاني كمان ومنوصلش لضربات الجزاء .. ودا مش معتاد من كولر أنه يخلص كل تغيراتة بدري .ز كولر مكنش بيبدأ يغير غير بعد الدقيقية 70 أو 75 كمان ,, لكن دا ممكن يكون سببه ان شايف أن معظم اللاعيبة مش في حالتها ..

 

خامساً : لاعيبة الزمالك .. لازم هنا نديهم حقهم ... هما ردوا على كل اللي كان بيتقال عليهم أو بينتقص منهم ويقولهم احسن ليكم مترحوش السعودية بأنهم فازو ... وعايز أقول للمسئولين عن الزمالك .. ياريت متصغروش ناديكم بأنكوا تخلوا حاملي الكورة يخبوها  ويضيعوا وقت بالطريقة الغبية دي أو ترمي الكورة جوا الملعب زي المشاهد اللي شوفناها في ماتش الدوري اللي الزمالك كسبة بالطريقة البايخة دي .. خليكم واثقين في نفسكم شوية وواثقين في لاعيبتكم .. انتوا بتعرفوا تكسبوا كورة اهه زي ما شوفنا في السوبر ... في النهاية مبروك للزملكاوية المحترمين بس .. اللي مش محترم ميستاهلش نباركلة .. وهارد لك للأهلاوية مش مهم خليك قنوع شوية الأهلي بياكل الأخضر واليابس بقالة سنتين .. سيبوا الناس تفرح واستحملوا الزيطة شوية  مش هايحصل حاجة .. علشان لما يجي يومنا نعرف نفرح بأة كويس متبأش الدنيا مكسب بس يعني دا ملل ..
الأهلي دايماً هايفضل بطل .