مدريد و التعادل مع مايوركا !! ما شعور مشجعي الملكي بعد التعادل في أول مباراه بـالدوري الأسباني ؟

 

ريال مدريد أعاد الـ غالاكتيكوس واللي هايتعادل معانا هيعمل فرح ....

وفعلاً مايوركا اتعادل مع مدريد في إفتتاحية الدوري للريال وفعلاً جماهير المنافسين عملوا فرح وفرح كبير كمان.

 

اللي متعودين عليه في ماتشات الريال اللي فاتت أن بيـ يعيش خصمة الوهم في الشوط الأول وبعدين يقلبها عليهم الشوط التاني .

بس اللي حصل في ماتش مايوركا كان العكس ... مدريد متعوا المشاهدين في الشوط الأول .. لدرجة أن لاعبي مايوركا مكانوش عارفين يمسكوا الكورة لمدة 10 ثواني بس ولاعبي الملكي بيستعرضوا كل لاعب بيعلي على التاني ...

ودي كانت المشكلة...

الشوط الأول خلص وأبتدى الشوط التاني والريال نزل مستخف بخصمة .. وهوب إتخطف بجول من ركنية .

و الكور الثابتة هاتكون أهم  سلاح من أسلحة أي خصم لريال مدريد علشان يقدر يسجل لانه فعلاً مش هاياخد الكورة كتير .

وبعد التعادل مايوركا قفل الملعب بكل طاقتة ، واستخدم كل الأساليب اللي ممكن يهٌدي بيها الرتم ويضيع بيها الوقت إن أمكن.

 

وزيد على كدا تأخر أنشيلوتي في استخدام التغييرات  علشان كدا الفريق ملقاش الحلول في مواجهة التكتل الرهيب في ملعب أصلاً ضيق ومافيهوش مساحات.

وخلص الماتش بتعادل .. وطرد كمان لميندي.

بس أنا كواحد من جمهور مدريد مش زعلان خالص دا كويس جداً أن الماتش دا جه في الأول كدا مش في مراحل الحسم لأن لاعيبة مدريد لازم تفهم أن الكورة مافيهاش تعالي وأن فريق الريال مينفعش يكتفي بشوط واحد كل مباراة.

لازم تعرف أن اوروبا كلها دلوقتي هاتنزل قدامك معندهاش حاجة تخسرها .. لو خسرت فهي بتلاعب فرقة هي الأقوى في العالم كله .. فعادي تخسر

 لاعيبة مدريد لازم تركز..  وتوزع مجهودها وتخلص الماتش أول ما تجيلها الفرصة ، مينفعش تتأثر  بالضغوط اللي بتخرجك من تركيزك،

ودا كله لازم يحصل  طول الماتش علشان تكسب ..  مش شوط واحد بس

في الاخر نصيحة لأي حد بيحب الكورة بجد ماتفوتش ماتش لريال مدريد الموسم دا .. علشان كل الماتشات هايكون فيها إثارة ومتعة مشوفتهاش قبل كدا وهاتتبسط أخر الموسم متقلقش ، أذا كنت بتشجع مدريد أو مبتشجعهاش